ನಗು ನಗಿಸು..

ಅಲ್ಲಿದ್ದ ಒಂದು ಊರು
ಅದ್ರಲ್ಲಿ ನೂರು ಸೂರು
ಮಂದಿಗೆಲ್ಲಾ ಕೈ ತುಂಬಾ ಕೆಲಸ
ಕಾಣುತಿತ್ತು ಎಲ್ಲರ ಮೊಗದಲ್ಲಿ ಸಂತಸ

ಹಬ್ಬ ಹರಿದಿನ ಅಲ್ವಲ್ಲಾ
ಆದರು ಲವಲವಿಕೆ ಇಂದ ಇದಾರಲ್ಲಾ
ಮನಸು ತಾಳದೆ ಕೇಳೆ ಬಿಟ್ಟೆ
ಏನ್ರಿ ಲಾಟರಿ ಗೀಟರಿ ಹೊಡಿತಾ ಹೇಗೆ ?

ನಗುತ್ತಾ ಹೇಳಿದನವನು - ನಿಮ್ಮ ಹಾಗೆ ರೀ ನಾವು
ನಮ್ಮಲ್ಲೂ ಇದೆ ಸಾವು ನೋವು
ಹಾಗಂತ ಸದಾ ಅಳ್ತಾ ಕೂತ್ರೆ
ಖಾಲಿನೆ ಉಳಿತಾವೆ ಮನೇಲಿ ಪಾತ್ರೆ

ಕೈಗೆ ಕೆಸರ ಹಚ್ಚಿ ದುಡಿತೀವಿ ನೋಡಿ
ಸಿಕ್ಕಿದ್ರಲ್ಲಿ ಹಂಚಿ ಉಣ್ತೀವಿ ಎಲ್ರೂ ಕೂಡಿ
ನಗುವು ನಮ್ಮ ಬಳಿ ಇದ್ರೆ
ಸಾರುತೀವಿ ಅದನ್ನ ಪ್ರತಿಯೊಬ್ಬರಿಗೆ

ಈ ನುಡಿಯ ಕೇಳಿ , ಅದರೊಳಾರ್ಥವನು
ಅರಿತು , ಹೆಜ್ಜೆಯನು ಮುಂದಿಟ್ಟೆ

ಸರಿ ಎಂದು ಹೊರಟ ನಂಗೆ
ಡಿ ವಿ ಜಿ ಕಗ್ಗ ನೆನಪಾಯಿತು ಹಂಗೆ

"ನಗುವೊಂದು ರಸಪಾಕವಳುವೊಂದು ರಸಪಾಕ
ನಗುವಾತ್ಮ ಪರಿಮಳವ ಪಸರಿಸುವ ಕುಸುಮ
ದುಗುಡವಾತ್ಮವ ಕಡೆದು ಸತ್ತ್ವವೆತ್ತುವಮಂತು
ಬಗೆದೆರಡನು೦ ಭುಜಿಸು - ಮಂಕುತಿಮ್ಮ "

" ನಗುವು ಸಹಜದ ಧರ್ಮ, ನಗಿಸುವುದು ಪರಧರ್ಮ,
ನಗುವ ಕೇಳುತ ನಗುವುದು ಅತಿಶಯದ ಧರ್ಮ
ನಗುವ ನಗಿಸುವ ನಗಿಸಿ ನಗುತ ಬಾಳುವ
ವರವ ಮಿಗೆ ನೀನು ಬೇಡಿಕೊಳೋ ಮಂಕುತಿಮ್ಮ "